चौकटीबाहेरचा राजा

२/२०/२०२५

श्री अमोल भागवत

अमेरिकेत राहून , आपल्या अंगवळणी पडलेल्या अनेक सवई लोप पावतात, त्यातलीच एक सवय म्हणजे रविवारी निवांतपणे पेपर वाचणे. त्या दिवशी पेपरलाही डिमांड असायची आणि म्हणुनचं की काय रविवारी अनेक पुरवण्या असत. 😉

लोकसत्ता लोकरंग पुरवणी - रविवार चा पेपर कोण कोण वाचायचे?

अश्याच कुठल्याश्या रविवारी लोकरंग ची पुरवणी हाताळताना, “अनुदिनी” लेख वाचला. एका मध्यमवर्गीय कुटुंबातील होणारे संभाषणच होते ते, अगदी प्रत्येक घरात होते तसेच.

दिवसेंदिवस ही लेख मालिका त्यातील आई , बाबा, भाऊ, बहिण आणि आजोबा , त्यातील संभाषण आणि आजुबाजुला घडणाऱ्या घटनांवर येणारी त्यांची प्रतिक्रिया ह्यामुळे रविवारच्या पेपर वाचनाचा अविभाज्य भाग बनला.काही महिन्यांनी ह्या लेख मालिकेने रजा घेतली.

अचानक, एका शुक्रवारी टीव्हीवर नवीन मराठी मालिका सुरू झाली . मालिकेच्या टायटल सॅांग मधेच “अनुदिनी” चा उल्लेख होता. मालिका त्यातील शेखर, श्यामला, शिर्या, शलाका आणि टिपरे आजोबांमुळे थोड्याच कालावधीत लोकप्रिय झाली.